我覺得...黎左台灣既冇必要踩低香港，係香港既亦冇必要踩低台灣，兩地各有各好，點都好過翻大灣區，如果要講錢真係冇得比較，我今年岩岩畢業開始係台灣翻工，比較下個人感受到既優缺點比你參考下：

優點：

竟然冇人提健保？基本上好多病痛/炒車去睇，仲有每半年準時去洗牙都係100臺幣搞定，而且大部分醫院都可以用，我以前係香港支氣管炎，去公立醫院排到好翻都未有得睇= =

生活節奏舒服好多呢就好多人講啦，我宜家收工約下朋友食飯，六日抽時間去衝浪，diving，free diving，爬山，我知呢D活動香港都有，但地方選擇冇咁多元lo，係台灣，一日游可以去新北，宜蘭，weekend可以去遠少少去花蓮，墾丁，長假期直接殺去綠島小琉球，香港呢點真係好難競爭...

文創風氣又係居然冇人提？台灣無論政府定消費者，對文創藝術範疇都好支持，尤其是D獨立樂團真係冇L得頂，百花齊放，一年精彩過一年，咩風格都有，氣氛又好，去聼一次live真係同屌驢仔一樣翻唔到轉頭，人手一支啤酒係大草皮都一齊high一齊跳。仲有電影...金馬獎岩岩先完我唔描述咁多啦，小衆小小仲有手作，插畫，無論係你鍾意定係自己想創作，台灣個大環境都係友善好多倍呢一點香港真係請打手都打唔翻...

買樓買車起碼叫見到希望，係香港唔靠老豆老母真係完全冇希望，台灣起碼有唔同縣市唔同區有唔同價位同生活節奏可以選擇，就算臺北有樓同香港一樣貴，Size同環境都有D差距。

較多中小企，人情味充足既工作環境，我宜家公司老細知我係香港人，每年過年願意比一個月假期比我翻香港WFH，呢種公司係香港真係難揾。

缺點：

食野冇甘多選擇，如果以生活黎講真係差甘D，係香港求其入一間茶記乜L都有得食，係台灣食得多就知，間間都係滷肉飯，排骨飯，鷄腿飯，旅行食一兩餐就爽，日日食？我宜家聞到都唔多舒服。

交通規劃混亂，綠燈過斑馬綫系會隨時有車係你面前經過，好多路冇妥善分劃行人路，係要行出馬路，唯一好處可能係唔會有狗叫你上翻行人路？

好多生活方式要重新適應，但我老實講我覺得呢個唔太算台灣既缺點，你去任何一個新地方生活，都要重新適應啦，老實講你黎台灣適應唔到，你去其他地方都一樣未必適應到，但要時間重新適應確實係會有D唔慣，但我自己經歷就係開學第一日就迅速融入。（利申我黎台灣讀書前未黎過台灣旅行）

物質生活上難同香港競爭，尤其是買D國際品牌或者去旅行，香港本身物價高，所以對於全球統一定價既野會覺得平，好似iPhone咁，旅行都係，好多國家對香港黎講都係物價比較低，會玩得爽D

國際格局，比起香港，台灣好多流行文化比較local，香港就會跟國際跟得貼D，但我覺得呢一點近兩年已經改善好多

難分優缺：

行政混亂，呢個我唔會特別反駁，但我覺得唔完全係缺點，台灣有句説話：有關係就沒關係，可能好多人係香港習慣左有嚴謹行政標準，會覺得台灣公務員hea，呢個真，但我自己經歷就反而多左好多走棧位，超速被人捉到成功求情過關，搞工作居留證我缺少文件，肯比我翻屋企fax補件，唔洗走多轉，但都試過畢業個陣因爲移民署職員唔清楚條例比人點黎點去，唯有自己搞行政程序前要做足功課，因爲行政單位一定hea過你。

我覺得最根本既分別真係生活同生存，係香港真係就搏命揾錢，然後成爲大家眼中過得唔錯既人甘樣，但台灣真係有比較多既空間去創造自己享受既生活，比較明顯既比較就係我香港D frd畢業揾工，主要討論就係人工高唔高，hea唔hea，但台灣朋友就係，我想去既呢間公司以前做過D咩好吸引我，我都想做出呢D成績。

但最終都係要睇原po你自己比較鍾意點樣既生活，如果你中意生活更加多元，enjoy慢節奏生活，對藝術文創，或者自然生態有興趣既，就儘早台灣開始發展好過，但如果你係對於物質生活有追求既，當然就係留翻係香港好D啦，我認爲最重要係你自己因爲咩原因想黎台灣，既然你有呢個念頭，一定係香港有你唔中意或者台灣有你中意既地方，認真比較下優大於缺定缺大於優，我相信你就會有答案。

我係香港人，中學畢業黎台灣讀大學，目前岩岩畢業係台灣翻緊工，已經準備工作五年後係台灣定居，有咩想問都可以留言問，答到盡量答。